هستيريا .. من المجنون: نحنُ أم الظروف؟

 

اتفرجت من فترة على فيلم 'هستيريا' لأحمد زكي وعبلة كامل وشريف منير،

لأول مرة حاجة تحصللي زي كدا، اول مرة أتفاعل مع الابطال بطل بطل من أول 'زين .. أحمد زكي' وهو شاب فى عيلة معدمة لسة بيحاول انه يستبقي الأخلاق والقيم والذوق الرفيع فى عالم انعدمت فيه كل ده، بيحب يغني فى محطة مترو الأنفاق وفيه واحدة 'نهى العمروسي' أغني منه بمراحل وبتحبه أو بتحب وجوده فى حياتها وكل شوية تقنعه يجي يتجوزها، ابوها يمارس كل الوسائل لإذلاله وإشعاره أنه من طبقة متدنية جدا ..

و'وداد .. عبلة كامل' ، هذه الشخصية الفريدة من نوعها، للوهلة الأولي تفتكرها مجنونة وغريبة الاطوار، عفوية واللي على قلبها على لسانها .. هي مش مجنونة لكن الحياة وضغوطاتها هما اللي سببوا انها تفقد الرغبة فى الالتزام بالقواعد التعسفية فى المجتمع .. واحدة قربت تعنس وأختها مطلقة وعاوزة تتجوز جارهم المتجوز أساسا وبتعاملها زي ما تكون مجنونة على طول ومش طايقة وجودها فى البيت ..

شريف منير، أخو زين وضحية جديدة للتفرقة بين الأخوة .. كاره الفقر وكاره المبادىء اللي شايف انها سببت القهر له ولأهله وبيحاول يجيب فلوس بشتى الطرق حتى لو وصل به الأمر الي أنه يلبس لبس امرأة وكأنه فتاة ليل وياخد من الرجال فلوس وبعدين يطلع المطواة بتاعته ويهددهم انهم يفضلوا ساكتين ويهرب بالفلوس .. نصب يعني ..

اختهم الصغير 'ألفت إمام' اللي وقع حظها فى حب جارهم الافقر منهم المصوراتي الغلبان .. بقالها سبع سنين نفسها أخوها 'شريف منير' يرضى عن حبيبها لكن هيهات .. وفعلا الظروف مش بتتحسن،

'نهى العمروسي' هذه الغنية المدللة اللي كل اللي بتطلبه بيجيلها، كل شوية ابوها يجوزها حد هي مش بتحبه وتطلق وترجع تدور على زين عشان تقضي معه وقت لطيف وتاخده لابوها ويطردوه وهي تعبت من احتياجها لزين وهو مش هينفع يكون اكتر من صديق حميم بس.

لو فتحت فى وصف الشخصيات وظروفهم اللي مفيهاش أمل، مش هخلص،
قدر المؤلف انه يوصف شخصيات تبان من بره انهم فى حالة 'هستيريا' او جنون ... لكن لو ركزت معاهم شوية هتقدر تشوف المجتمع ممكن يوصل لإيه .. هما مش مجانين لكن العالم اللي هما فيه هو اللي مجنون،

الغريب بقى انه على قد عشقي للشخصيات كلهم بلا استثناء بتعقيداتهم وتفاصيلهم المجنونة، لكن وصلني إحساس ان المؤلف تعب من كتر ما أتقن رسم الشخصيات لدرجة انه نسي فى الآخر يعمل حبكة كويسة يربط الشخصيات دول كلهم ببعض ..

الفيلم ممتاز من ناحية رسم كل بطل او كل دور ثانوي، لكن هو ركز على أحمد زكي وأن كل واحد من دول فى النهاية بيتعامل معاه، بيأثر فيهم وبيتأثر بيهم .. وده من غير حبكة حقيقية تشد المشاهد ..
اول مرة أعشق الشخصيات لكن مش الحكاية، حكاية روتينية مملة، عبارة عن حياة معيشية بتتكون من مشاهد بعضها فكاهى وبعضها صادم لكن فى النهاية بدون أهم وصفة فى أي عمل درامي او أدبي .. الحبكة اللي بتفرق بين الحكاية وبين مجرد سرد ..
هستيريا، مغامرة غريبة وفريدة وشخصيات ثرية جدا لدرجة ان فيلم واحد مش مكفيهم بجد ..